Canfu gwaith ymchwil gan gorff rhagflaenu Llais Defnyddwyr Cymru, sef Cyngor Defnyddwyr Cymru, fod defnyddwyr yn ansicr o’u hawliau preifatrwydd o ran gweithwyr iechyd rhywiol proffesiynol yn rhannu gwybodaeth bersonol ac mae’n rhaid i swyddogion iechyd yng Nghymru fynd i’r afael â’r broblem hon. Roedd dryswch ynghylch a fyddai gwybodaeth yn cael ei throsglwyddo i rieni pe bai’r unigolyn o dan 16 oed.
Mewn un achos, dywedwyd wrth ferch ysgol a oedd yn aros i gael canlyniadau STI y byddai’r clinig yn ffonio ei rhif cartref er mwyn rhoi’r canlyniadau. Achosodd hyn ofid mawr iddi gan ei bod yn poeni y byddai ei rhieni yn ateb y ffôn.
Dywedodd Jennie Bibbings, uwch eiriolwr polisi yn Llais Defnyddwyr Cymru: “Rydym am weld ymrwymiad i safonau uchel o ofal cwsmeriaid ym mhob rhan o’r sector gofal iechyd rhywiol yng Nghymru. Mae gwaith ymchwil yn dangos bod lle i wella yn y maes hwn. Mae angen i weithwyr iechyd proffesiynol hefyd sicrhau bod systemau ar waith i ddiogelu cyfrinachedd cwsmeriaid, gan ei fod yn destun dryswch ac embaras i rai pobl.”
Roedd Llais Defnyddwyr Cymru hefyd yn annog Llywodraeth Cynulliad Cymru i beidio ag ystyried pobl ifanc yn unig yn y ffordd y mae’n darparu gwasanaethau.
Ychwanegodd Jennie Bibbings: “Gall cydberthnasau ddod i ben ar unrhyw adeg mewn bywyd, ac ar yr adeg honno gall unigolion ddechrau cydberthnasau rhywiol newydd gydag ymwybyddiaeth isel o sut i gael rhyw mwy diogel.
“Rydym am sicrhau bod pawb yng Nghymru yn cael yr un cyfle i gael gafael ar y wybodaeth a’r gwasanaethau iechyd rhywiol sydd eu hangen arnynt.
“Rydym yn croesawu ymrwymiad y papur gwaith i gynnwys iechyd rhywiol mewn rhaglenni Datblygiad Proffesiynol Parhaus i feddygon teulu, nyrsys practis a staff gweinyddol practisau, a byddwn yn argymell yn gryf fod yr hyfforddiant hwn yn cwmpasu gofal cwsmeriaid a chyfrinachedd.”
Mae ymateb Llais Defnyddwyr Cymru hefyd yn galw am i fwy o gondomau fod ar gael i grwpiau â risg uchel, gan annog Llywodraeth y Cynulliad i beidio ag anwybyddu puteindra yn ei gwaith, a gwella’r gwasanaethau erthyliad a ddarperir ledled Cymru.
Am ragor o wybodaeth, cysylltwch â Jamie/Angharad ar 029 2078 7110/1
