Amdanom Ni

Uned Cymorth Ychwanegol

Mae dyletswydd ar Llais Defnyddwyr dan Adran 13 o Ddeddf Defnyddwyr, Gwerthwyr Tai a Gwneud Iawn i ddelio ag achosion lle mae cyflenwad y defnyddiwr wedi’i ddatgysylltu neu lle mae bygythiad i’w ddatgysylltu, gan gynnwys achosion rhai sy’n talu ymlaen llaw sydd heb gyflenwad.

Mae gan Llais Defnyddwyr bwerau hefyd dan Adran 12 i ddelio ag achosion sy’n ymwneud â gwasanaethau ynni a phost a gafwyd gan ddefnyddwyr sy’n agored i niwed. Y diffiniad o ddefnyddiwr sy’n agored i niwed yn Neddf Defnyddwyr, Gwerthwyr Tai a Gwneud Iawn yw rhywun nad yw’n rhesymol disgwyl iddo fynd ynghylch y gwyn ei hun.

Diffiniad

Mae diffiniad wedi’i gymeradwyo gan Fwrdd Llais Defnyddwyr sy’n cydnabod y gallai defnyddiwr fod yn agored i niwed oherwydd ei amgylchiadau personol a/neu am fod ei gwyn o natur frys neu gymhleth.

Mewn llawer o sefyllfaoedd, byddai Cyswllt Defnyddwyr yn dal i allu helpu defnyddwyr a allai fod yn agored i niwed drwy:

• ddarparu cyngor, defnyddio’r trefniadau grymuso i gyfeirio’r defnyddiwr at dîm uwch yn y cwmni cyflenwi, neu
• drwy gyfeirio’r defnyddiwr at y Cynllun Gwneud Iawn.

Byddai rhai sefyllfaoedd, er hynny, lle na fyddai’r dewisiadau hyn yn briodol, gan gynnwys rhai lle nad oedd y defnyddiwr yn gallu deall neu ddilyn y cyngor a roddwyd a lle’r oedd atgyfeiriad grymuso blaenorol i’r cwmni cyflenwi wedi methu â datrys y mater.

Mae canllawiau wedi’u datblygu gyda’r diwydiant a fydd yn caniatáu i Cyswllt Defnyddwyr drosglwyddo achosion i uned ‘Cymorth Ychwanegol’ Llais Defnyddwyr os nad yw defnyddiwr yn gallu mynd ynghylch ei gwyn gyda’i gwmni cyflenwi oherwydd:

• Natur frys ei sefyllfa e.e. camau i gasglu dyled neu drefniant talu anymarferol
• Ei amgylchiadau personol, lle nad yw’r defnyddiwr yn gallu delio â’r mater ei hun
• Natur gymhleth y broblem, sy’n ei gwneud yn anodd i’r defnyddiwr ddelio’n uniongyrchol â’i gwmni cyflenwi ac sy’n golygu bod arno angen cymorth gan arbenigwr i ddatrys ei broblem.

Er y bydd y rhan fwyaf o achosion Llais Defnyddwyr wedi’u hatgyfeirio iddo gan Cyswllt Defnyddwyr, bydd angen derbyn nifer bach o achosion o ffynonellau eraill hefyd, gan gynnwys:

• Atgyfeiriadau gan Ofgem a Postcomm
• Cwynion gan Aelodau Seneddol
• Atgyfeiriadau o’r Cynlluniau Gwneud Iawn